మెట్రో సిటీల కంటే చిన్న నగరాలే స్పీడ్..

విశాఖ సహా ఈ ప్రాంతాల్లో భారీగా పెరిగిన ఇళ్ల ధరలు!:

ఇటీవలి కాలంలో రియల్ ఎస్టేట్ డిమాండ్ విపరీతంగా పెరుగుతున్న సంగతి తెలిసిందే. అయితే ఇక్కడ 2021-26 మధ్య చూస్తే పలు మెట్రో నగరాలతో పోలిస్తే విశాఖపట్నం, గోవా, లఖ్నవూ, కోయంబత్తూర్ సహా మొత్తం 11 టియర్ 2 నగరాల్లో ఇళ్ల ధరలు ఏకంగా 63 శాతం పెరిగాయి. ఈ మేరకు సీఐఐ- నైట్ ఫ్రాంక్ రిపోర్ట్ తెలిపింది.

దేశంలోని రియల్ ఎస్టేట్ రంగంలో పను మార్పులు సంభవిస్తున్నాయి. పెద్ద పెద్ద మెట్రో నగరాలతో పోలిస్తే టియర్- 2 నగరాల్లోనే ఇళ్ల ధరలు వేగంగా పెరుగుతున్నాయి. ఇక్కడ హైదరాబాద్, ముంబై, బెంగళూరు వంటి మెట్రో సిటీలు కూడా వెనుకంజలోే ఉండటం గమనార్హం. చిన్న నగరాల్లో కూడా క్రమంగా మౌలిక వసతులు మెరుగుపడటం, కనెక్టివిటీ పెరుగుతుండటం వీటితో పాటు స్థానికంగా ఆర్థిక కార్యకలాపాలు వేగంగా విస్తరిస్తుండటం ఇందుకు ప్రధాన కారణాలు అని సీఐఐ- నైట్ ఫ్రాంక్ ఇండియా నివేదికలో వెల్లడించింది.

ఇండియాస్ నెక్ట్స్ రియల్ ఎస్టేట్ మార్కెట్ పేరిట సెప్టెంబర్ 18న విడుదల చేసిన రిపోర్ట్ ప్రకారం 11 టియర్- 2 మార్కెట్లలో 2021 నుంచి 2026 మధ్య ఇళ్ల ధరలు సగటున 63 శాతం పెరిగాయి. ఇదే సమయంలో దేశంలోని 8 ప్రధాన మెట్రో నగరాల్లో ధరల పెరుగుదల కేవలం 42 శాతంగానే ఉంది.

లిస్టులో విశాఖపట్నం కూడా:

ఈ రిపోర్టులో భువనేశ్వర్, భోపాల్, చండీగఢ్ ట్రైసిటీ, ఇందోర్, గోవా, కొచ్చి, జైపూర్, నాగ్పూర్, లఖ్నవూ, కోయంబత్తూర్ సహా తెలుగు రాష్ట్రాల నుంచి విశాఖపట్నం కూడా ఉంది. ఈ నగరాలన్నింటినీ ప్రస్తుతం అభివృద్ధి చెందుతున్న రియల్ ఎస్టేట్ మార్కెట్లుగా గుర్తించారు. 2016-26 మధ్య ఈ 11 నగరాల్లో సగటున ఇళ్ల ధరలు ఏటా 8 శాతం CAGR తో పెరిగాయి. ఇక ముంబై, బెంగళూరు, హైదరాబాద్, దిల్లీ- NCR, చెన్నై, పుణె, అహ్మదాబాద్, కోల్కతా వంటి ప్రధాన నగరాల్లో వృద్ధి 4 శాతంగానే ఉంది.

ఇంకా ఈ మార్కెట్లలో సగటు ఇళ్ల ధరలు ఒక్కో చదరపు అడుగుకు సుమారు రూ. 4500 నుంచి రూ. 13500 వరకు ఉన్నట్లు సీఐఐ- నైట్ ఫ్రాంక్ రిపోర్ట్ తెలిపింది. ముఖ్యంగా కొవిడ్ తర్వాతి కాలంలో హైబ్రిడ్ వర్కింగ్ మోడల్ పెరగడంతో ఉద్యోగ ప్రదేశానికి దగ్గరగా మాత్రమే ఇల్లు కొనాలనే ఆలోచనలో మార్పు వచ్చిందని పేర్కొంది. దీంతో టియర్- 2 నగరాల్లో కూడా మంచి సౌకర్యాలు ఉన్న ఇంటిగ్రేటెడ్ కమ్యూనిటీలకు డిమాండ్ పెరుగుతోంది. అయితే డిమాండ్ ప్రతి నగరంలో ఒకేలా ఉండదు. ఇక భారత రియల్ ఎస్టేట్ రంగం 2047 నాటికి 5.8 ట్రిలియన్ డాలర్ల స్థాయికి చేరొచ్చని ఈ నివేదిక అంచనా వేసింది. ఇందులో టియర్- 2, టియర్- 3 నగరాల వాటానే 25 నుంచి 30 శాతం వరకు అంటే సుమారు 1.4- 1.7 ట్రిలియన్ డాలర్లుగా ఉండొచ్చని అంచనా వేసింది.