హైదరాబాద్‌లో రియల్‌ ఎస్టేట్‌ బూమ్‌..!

ఈ 8 ప్రాంతాలే హాట్‌.. 2026లో ఇల్లు కొనాలంటే ఇదే కీలకం!:

హైదరాబాద్‌: హైదరాబాద్‌ రియల్‌ ఎస్టేట్‌ మార్కెట్‌లో డిమాండ్‌ కొనసాగుతోంది. ధరలు తగ్గుతాయని భావించి కొనుగోలు నిర్ణయాన్ని వాయిదా వేస్తున్న వారికి తాజా మార్కెట్‌ గణాంకాలు భిన్నమైన సంకేతాలను ఇస్తున్నాయి. 2025లో హైదరాబాద్‌లో 38,403 నివాస గృహాల విక్రయాలు నమోదయ్యాయి. అంతకుముందు ఏడాదితో పోలిస్తే ఇది 4 శాతం వృద్ధి. అదే సమయంలో నివాస ఆస్తుల సగటు ధరలు సుమారు 13 శాతం పెరిగినట్లు గణాంకాలు సూచిస్తున్నాయి.

ముఖ్యంగా కోకాపేట్‌, నర్సింగి, గచ్చిబౌలి, కొండాపూర్‌, పుప్పాల్‌గూడ, నానక్‌రామ్‌గూడ, ఫైనాన్షియల్‌ డిస్ట్రిక్ట్‌, తెల్లాపూర్‌ ప్రాంతాల్లో కొనుగోలుదారుల ఆసక్తి ఎక్కువగా కనిపిస్తోంది. ఐటీ సంస్థల విస్తరణ, ఔటర్‌ రింగ్‌ రోడ్‌ కనెక్టివిటీ, వాణిజ్య కేంద్రాల అభివృద్ధి, అంతర్జాతీయ పాఠశాలలు, ఆసుపత్రులు వంటి మౌలిక సదుపాయాలు ఈ ప్రాంతాల డిమాండ్‌కు ప్రధాన కారణాలుగా ఉన్నాయి.

రూ.కోటి పైబడిన ఇళ్లకు పెరిగిన డిమాండ్‌

ప్రీమియం గృహాల విభాగం కూడా జోరుగా సాగుతోంది. రూ.కోటి కంటే ఎక్కువ విలువైన ఇళ్ల రిజిస్ట్రేషన్లు 35 శాతం పెరిగినట్లు గణాంకాలు చెబుతున్నాయి. మొత్తం రిజిస్ట్రేషన్‌ విలువలో ఈ విభాగం దాదాపు 48 శాతం వాటా కలిగి ఉండటం గమనార్హం.

అయితే మార్కెట్‌లో 54,878 అమ్ముడుపోని ఇళ్ల నిల్వ ఉండటం కొనుగోలుదారులకు కొంత వెసులుబాటు కల్పిస్తోంది. మరోవైపు కొత్త ప్రాజెక్టుల ప్రారంభాలు 7 శాతం తగ్గి 40,737 యూనిట్లకు చేరాయి.

కొనుగోలుదారులకు నిపుణుల సూచన

సొంత నివాసం కోసం 7–10 ఏళ్ల దీర్ఘకాలిక దృష్టితో కొనుగోలు చేసేవారు ప్రదేశం, నిర్మాణ నాణ్యత, డెవలపర్‌ విశ్వసనీయత, రుణభారం, ప్రభుత్వ అనుమతులు వంటి అంశాలను పరిశీలించి నిర్ణయం తీసుకోవాలి. కేవలం స్వల్పకాలంలో ధరలు రెట్టింపు అవుతాయని ఆశించి పెట్టుబడి పెట్టడం మాత్రం ప్రమాదకరమే.

2026లో హైదరాబాద్‌లో అసలు ప్రశ్న “ఇల్లు కొనాలా?” కాదు.. “సరైన ప్రాంతాన్ని ఎంచుకున్నామా?” అనేదే!