హైదరాబాద్‌లో GCCల జోరు.. రియల్ ఎస్టేట్‌కు కొత్త ఊపు!

ఉద్యోగాల నుంచి ఇళ్ల విక్రయాల వరకు ప్రభావం.. 2035 నాటికి గ్లోబల్ కెపబిలిటీ క్యాపిటల్‌గా హైదరాబాద్?:

హైదరాబాద్: గ్లోబల్ కెపబిలిటీ సెంటర్ల (GCC) విస్తరణతో హైదరాబాద్ రూపురేఖలు వేగంగా మారుతున్నాయి. ప్రపంచ స్థాయి కంపెనీలు నగరంలో తమ కార్యకలాపాలను విస్తరిస్తుండటంతో ఉద్యోగాలు, వాణిజ్య కార్యాలయాలు, నివాస గృహాలు, రిటైల్ రంగం, రవాణా, మౌలిక వసతులకు డిమాండ్ పెరుగుతోంది.

ప్రస్తుతం హైదరాబాద్‌లో 500కు పైగా GCCలు పనిచేస్తుండగా, వీటిలో 3 లక్షలకు పైగా నిపుణులు ఉద్యోగాలు చేస్తున్నట్లు FICCI తెలంగాణ స్టేట్ కౌన్సిల్ చైర్మన్ VV రామ రాజు తెలిపారు. దేశవ్యాప్తంగా GCCలలో పనిచేస్తున్న ఉద్యోగుల్లో హైదరాబాద్ వాటా సుమారు 20 శాతంగా ఉందని పేర్కొన్నారు.

కమర్షియల్ రియల్ ఎస్టేట్‌కు భారీ డిమాండ్:

GCCల విస్తరణకు అనుగుణంగా నగరంలో కార్యాలయ స్థలాలకు డిమాండ్ గణనీయంగా పెరుగుతోంది. 2026 తొలి ఆరు నెలల్లోనే 52 లక్షల చదరపు అడుగుల వాణిజ్య స్థలాన్ని కంపెనీలు స్వీకరించగా.. అందులో GCCల వాటా 40–45 శాతంగా ఉన్నట్లు టెర్మినస్ గ్రూప్ చైర్మన్ ఎస్పీ రెడ్డి తెలిపారు.

దీంతో ఐటీ కారిడార్లతో పాటు కీలక ప్రాంతాల్లో కమర్షియల్ ప్రాపర్టీ మార్కెట్ మరింత బలపడే అవకాశాలు కనిపిస్తున్నాయి.

ఇళ్ల విక్రయాల్లోనూ జోష్:

కార్యాలయాల విస్తరణతో పాటు ఉద్యోగుల సంఖ్య పెరగడం నివాస రియల్ ఎస్టేట్‌పై కూడా ప్రభావం చూపుతోంది. హైదరాబాద్‌లో ఇళ్ల విక్రయాలు ఏడాది ప్రాతిపదికన 12 శాతం పెరిగి సుమారు 23,700 యూనిట్లకు చేరుకున్నాయి.

ఉద్యోగాలు, పెట్టుబడులు, కంపెనీల విస్తరణ కొనసాగితే నగరంలో అపార్ట్‌మెంట్లు, విల్లాలు, అద్దె ఇళ్లు, రిటైల్ స్పేస్‌కు డిమాండ్ మరింత పెరిగే అవకాశం ఉందని పరిశ్రమ వర్గాలు అంచనా వేస్తున్నాయి.

2035 లక్ష్యంగా హైదరాబాద్:

ANAROCK ఎండీ ప్యూష్ జైన్ ప్రకారం హైదరాబాద్‌లో ఇప్పటికే 1.4 బిలియన్ చదరపు అడుగులకు పైగా అభివృద్ధి చెందిన మౌలిక వసతులు ఉన్నాయి. ఈ బలమైన మౌలిక వసతులు ప్రపంచ కంపెనీలను ఆకర్షించడంలో కీలకంగా మారుతున్నాయి.

GCCలు కేవలం ఉద్యోగాలకే పరిమితం కాకుండా రియల్ ఎస్టేట్, రిటైల్, రవాణా, హోటళ్లు, సేవారంగం, పట్టణ మౌలిక వసతులపై బహుళ ప్రభావం చూపుతున్నాయి.

ఇదే వేగం కొనసాగితే 2035 నాటికి హైదరాబాద్ దేశంలోని ప్రధాన గ్లోబల్ కెపబిలిటీ క్యాపిటల్‌గా ఎదిగే అవకాశాలు మరింత బలపడుతున్నాయి.